चंद्रपूर शहरात तीन युवकांना गांजा सेवन करताना अटक…..
चंद्रपूर :- चंद्रपूर शहरात अंमली पदार्थांची उपलब्धता वाढल्याने चिंतेचे वातावरण निर्माण झाले आहे. गांजाच्या तस्करीच्या मुख्य म्होरक्याचे उलगडलेले सूत्र अद्यापही पोलीसांना मिळालेले नाही. काही भागात तर अल्पवयीन मुलं आणि तरुणांची गांजा विक्रीमध्ये संलिप्तता वाढली आहे.
News reporter :- अतुल दिघाडे
गुरुवार, २७ जानेवारी २०२५ रोजी चंद्रपूर स्थानिक गुन्हे शाखेने एक मोठी कारवाई केली, ज्यात तीन युवकांना गांजा सेवन करताना रंगेहाथ अटक करण्यात आली. बाबुपेठ गार्डन आणि कामगार चौक परिसरात चिलम मध्ये गांजा भरून धुराचा आनंद घेत असताना २४ वर्षीय आदित्य संजय पाटील, २९ वर्षीय महेंद्र राजेंद्र मोरे आणि ३२ वर्षीय क्रिष्णकुमार रामपाल तिवारी यांना ताब्यात घेतले. त्यांच्यावर एनडीपीएस ऍक्ट (कलम २७) नुसार गुन्हे दाखल करण्यात आले आहेत.
पोलीसांनी या युवकांकडून गांजा कुठून आणला याबाबत अद्याप कशाही प्रकारची माहिती मिळवली नाही. या संदर्भात पोलिसांनी विचारणा सुरू केली आहे. संबंधित युवकांनी योग्य माहिती दिल्यास पोलीस अधिक प्रभावी कारवाई करू शकतात.
सदर कारवाई पोलिस अधीक्षक मुमक्का सुदर्शन आणि अप्पर पोलीस अधीक्षक रीना जनबंधू यांच्या मार्गदर्शनाखाली स्थानिक गुन्हे शाखेचे पोलीस निरीक्षक महेश कोंडावार यांच्या नेतृत्वात करण्यात आली. यामध्ये पोलीस कर्मचारी सुरेंद्र महतो, सतीश अवथरे, संतोष येलपुलवार, गोपाल आतकुलवार, नितीन रायपुरे, गोपीनाथ नरोटे, प्रमोद कोटनाके, मिलिंद टेकाम यांचा महत्वपूर्ण सहभाग होता.
पोलिसांचे आवाहन:
अंमली पदार्थांची खरेदी, विक्री किंवा सेवनासंदर्भात कोणतीही माहिती असल्यास नागरिकांनी तात्काळ चंद्रपूर पोलीस नियंत्रण कक्षाच्या टोल-फ्री नंबर ११२ वर संपर्क साधावा.
या यशस्वी कारवाईला नागरिकांचीही दाद मिळाली असून, शहरात अंमली पदार्थांविरोधात कडक कारवाई होण्याची अपेक्षा व्यक्त केली जात आहे.
