जिल्हाप्रतिनिधी
चंद्रपूर :- चंद्रपूर – दत्त नगर येथील श्री नवयुक बाल गणेश मंडळने महानगरपालिका चंद्रपूरच्या पर्यावरणपूरक गणेश मंडळ स्पर्धेत मागील चार वर्षांपासून प्रथम क्रमांक प्राप्त केला आहे. यावर्षी मंडळ दहा वर्षांची सेवा पूर्ण करत असून, ‘वृक्षारोपण, पाण्याची बचत आणि समृद्ध शेती’ या विषयावर आधारित उत्कृष्ट देखावा सादर करणार आहे.
News reporter :- अतुल दिघाडे
मंडळाने 2020 मध्ये ‘रेन वॉटर हार्वेस्टिंग’वर आधारित देखावा सादर करून प्रथम क्रमांक प्राप्त केला. 2021 मध्ये कोरोना काळात ‘कोरोना प्रतिबंध’ विषयावर आधारित देखावा सादर करून प्रथम क्रमांक मिळवला. 2022 मध्ये ‘स्वच्छ चंद्रपूर’ या देखाव्यातून स्वच्छतेचे महत्त्व दर्शवून जनजागृती केली आणि 2023 मध्ये ‘पर्यावरण संरक्षण’ आणि ‘प्लास्टिकमुळे होणारे नुकसान’ यावर आधारित देखावा सादर करून प्रथम क्रमांक मिळवला.
यावर्षी, मंडळाने पाण्याची बचत आणि वृक्षारोपणाचे महत्त्व सांगणारा देखावा सादर करण्याची योजना केली आहे. या देखाव्यात विविध भिंतीवरील चित्रे, टाकाऊ वस्तूंमधून बनवलेले कलाकृती, कारंजे, महाकाली मंदिराची प्रतिकृती आणि ई-बाईक देखाव्यांसह पर्यावरणाचे महत्त्व दर्शवले जाईल.
यावर्षी मंडळाने विविध सामाजिक उपक्रम राबविण्याचे ठरवले आहे, ज्यामध्ये किल्ला स्वच्छता अभियान, आरोग्य शिबिर, रक्तदान शिबिर, शाळेतील मुलांना शैक्षणिक साहित्य वाटप, विज्ञान प्रदर्शनी, रांगोळी स्पर्धा, पारंपारिक वेशभूषा स्पर्धा, नृत्य स्पर्धा, पथनाट्य, महाराष्ट्रीयन खाद्यपदार्थांचे प्रदर्शन, कबड्डी, लगोरी, किल्ले बनवण्याची स्पर्धा, जुने नाणे प्रदर्शन आणि वृक्षारोपण यांचा समावेश आहे.
सर्व गणेश भक्तांनी दत्त नगर, नागपूर रोड, चंद्रपूर येथे मंडळाच्या सर्व उपक्रमांना आणि देखाव्यांना भेट देऊन समर्थन देण्याचे आवाहन मंडळाच्या वतीने करण्यात आले आहे.
