चंद्रपूर महापालिकेत आधुनिक ‘हाय सिवेज सक्शन मशीन’ची भर — स्वच्छतेला नवे तंत्रज्ञानाची जोड
चंद्रपूर :- चंद्रपूर महानगरपालिकेच्या स्वच्छता विभागात आज एक महत्त्वाचा टप्पा गाठण्यात आला आहे. पारंपरिक आणि वेळखाऊ स्वच्छता पद्धतींना मागे टाकत, आधुनिक तंत्रज्ञानावर आधारित ‘ट्रक माउंटेड – हाय सिवेज सक्शन मशीन’ आजपासून कार्यान्वित करण्यात आली आहे. या नव्या यंत्रामुळे शहरातील स्वच्छता कार्य अधिक जलद, प्रभावी आणि सुरक्षित होणार आहे.
News reporter :- अतुल दिघाडे
ही मशीन 4000 लिटर क्षमतेची असून, भूमिगत नाले, गटार, मेनहोल्स आणि ओपन ड्रेनेज सिस्टिम्सची सफाई यांत्रिक आणि आधुनिक पद्धतीने करू शकते. विशेषतः पावसाळ्यातील नालेसफाईसाठी ही मशीन अत्यंत उपयुक्त ठरणार आहे.
महानगरपालिकेच्या स्वच्छता विभागाने यापूर्वी पारंपरिक पद्धतीने मोठ्या प्रमाणावर श्रम खर्च करून नालेसफाई केली जात होती. त्यामुळे वेळ, श्रम आणि संसाधनांचा अपव्यय होत होता. मात्र आता, हाय सिवेज सक्शन मशीनमुळे या कामात वेळेची बचत होणार असून कामाची गुणवत्ता व कार्यक्षमता वाढणार आहे.
महानगरपालिकेचे अधिकारी म्हणाले, “ही मशीन केवळ स्वच्छतेसाठी नव्हे, तर स्वच्छ भारत अभियानाला चालना देणारी आणि नागरिकांच्या आरोग्यासाठी लाभदायक ठरणारी आहे. या नवीन उपक्रमामुळे शहरातील आरोग्यदायी आणि स्वच्छ वातावरण टिकवणे शक्य होईल.”
ही मशीन शहराच्या विविध भागांत फिरवण्यात येणार असून, नालेसफाईचे काम नियमित आणि योजनाबद्ध पद्धतीने करण्यात येईल.
नागरिकांनीही सहकार्य करावे, सार्वजनिक स्वच्छतेसाठी आपली जबाबदारी ओळखून महानगरपालिकेच्या कामात हातभार लावावा, असे आवाहन स्वच्छता विभागाने केले आहे,
