प्रचंड धुराचे लोट आणि आगीच्या ज्वाळा परिसरात पसरल्यामुळे भयावह स्थिती,
आग विझविण्यासाठी अग्निशमन दल करताहेत शर्तीचे प्रयत्न, कंपनीच्या निष्काळजीपणामुळे कोट्यावधीचे नुकसान.
चंद्रपूर :–
चंद्रपूर शहरालगत असलेल्या पडोली दाताळा MIDC परिसरात लक्की पेट्रोलियम ऑईल कंपनीत दुपारी भीषण आग लागली असून आगीने भीषण स्वरूप धारण केल्याने शेजारील कंपन्यांनाही मोठे नुकसान झालेले आहें. मात्र या घटनेत कोणतीही जीवितहानी झालेली नाही, दरम्यान आगीचे कारण गुलदस्त्यात असून आगीच्या कारणाचा शोध सुरु आहें.
दुपारी लागलेल्या या आगीची माहिती मिळताच अग्निशमन दलाच्या आठ गाड्या तातडीने घटनास्थळी दाखल झाल्या. आगीवर नियंत्रण मिळवण्यासाठी शर्तीचे प्रयत्न सुरू असून प्रचंड धुराचे लोट आणि आगीच्या ज्वाळा परिसरात पसरल्यामुळे भीतीचे वातावरण निर्माण झाले आहें, या आगीत सुदैवाने कोणतीही जीवितहानी झाली नसल्याचे वृत्त आहें, मात्र लक्की पेट्रोलियम ऑईल कंपनीत कोट्यावधींचे नुकसान झाल्याचा प्राथमिक अंदाज आहे.
दरम्यान एवढी मोठी MIDC परिसरात कोणतीही प्रभावी अग्निरोधक यंत्रणा नव्हती, यामुळे आज लागलेल्या आगीने लवकरच उग्र रूप धारण केले. कंपनी प्रशासनाच्या हलगर्जीपणामुळेच आग लागली असून ती आग आटोक्यात आणण्यात स्थानिक कंपनी प्रशासनाला मोठया अडचणी आल्या असल्याने स्थानिक नागरिकांनी संताप व्यक्त केला आहें, दरम्यान अग्निशमन दलाच्या अधिकाऱ्यांनी सांगितले की, कंपनीने योग्य ती सुरक्षा यंत्रणा बसवली असती, तर आगीवर वेळीच नियंत्रण मिळवता आले असते.
पर्यावरण व सुरक्षतेचे तीन तेरा
लक्की पेट्रोलियम ऑईल कंपनीत लागलेल्या आगीमुळे परिसरातील हवेची गुणवत्ता खालावली असून काळ्या धुराचे लोट दूरवर दिसत आहेत. यामुळे पर्यावरणावर विपरीत परिणामाची भीती व्यक्त केली जात आहे. औद्योगिक क्षेत्रात अशा घटना वारंवार घडत असल्याने सुरक्षेच्या उपाययोजनांकडे प्रशासनाचे पूर्णतः दुर्लक्ष केल्याने पर्यावरण व सुरक्षतेचे तीन तेरा वाजले आहें.
दरम्यान, पोलिस आणि प्रशासन घटनास्थळी पोहोचले असून आगीच्या पार्श्वभूमीवर कंपनी व्यवस्थापनाची चौकशी सुरू करण्यात आली आहे. कंपनीकडून अग्निरोधक उपाययोजना, अग्निशमन यंत्रणा आणि सुरक्षा प्रोटोकॉल पाळण्यात आला होता का नाही, याची तपासणी केली जात आहे. याशिवाय आगीचे नेमके कारण शोधण्यासाठी फॉरेन्सिक पथकाला पाचारण करण्यात आले आहे.
लक्की पेट्रोलियम ऑईल कंपनीव्यतिरिक्त इतर कंपन्याना फटका.
एमआयडीसी परिसरात असलेल्या लक्की पेट्रोलियम ऑईल कंपनीला लागलेल्या आगीमुळे जवळ असणाऱ्या इतर कंपन्यांना देखील खबरदारीचा इशारा देण्यात आला आहे. आगीच्या दुर्घटनांपासून धडा घेत सुरक्षा उपाययोजना काटेकोरपणे राबवाव्यात अशी मागणी स्थानिकांकडून केली जात आहे. औद्योगिक सुरक्षेच्या नियमांचे पालन न करणाऱ्या कंपन्यांवर कठोर कारवाई करण्याची आवश्यकता असल्याचेही नागरिकांनी म्हटले आहे.
या आगीमुळे अनेक कंपन्यांचे उत्पादन थांबले असून लाखो रुपयांचे नुकसान झाले आहे. काही कामगारांना तातडीने सुरक्षित ठिकाणी हलवण्यात आले. मात्र, आगीच्या धुरामुळे अनेकांना श्वसनाचा त्रास जाणवला असून त्यांना वैद्यकीय मदत देण्यात आली आहे.आगीवरील नियंत्रणासाठी अद्यापही प्रयत्न सुरूच आहेत. अग्निशमन दलाकडून इतर भागांमध्ये आग पसरण्याची शक्यता टाळण्यासाठी विशेष काळजी घेतली जात आहे. आग आटोक्यात आल्यानंतरच संपूर्ण परिस्थिती स्पष्ट होईल.
या घटनेनंतर एमआयडीसीतील सुरक्षा व्यवस्थांवर प्रश्नचिन्ह उपस्थित झाले आहेत. प्रशासनाने कंपन्यांच्या अग्निरोधक उपाययोजनांची पुन्हा एकदा तपासणी करण्याचे निर्देश दिले असून, भविष्यात अशा घटना टाळण्यासाठी योग्य ती खबरदारी घेण्याचे आदेश दिले आहेत.
