चंद्रपूर महानगरपालिकेची पाण्याच्या अडचणीवर धडक कारवाई
टिल्लू पंप जप्ती मोहीम झोन क्र,1 मधील साईबाबा वॉर्डात राबवली
चंद्रपूर, ता. २९ मे:
चंद्रपूर शहरात पिण्याच्या पाण्याचा प्रश्न दिवसेंदिवस गंभीर होत चालला असताना, महानगरपालिका प्रशासनाने या समस्येवर उपाययोजना म्हणून मोठा निर्णय घेतला आहे. मनपा आयुक्तांच्या स्पष्ट आदेशानुसार पाणीपुरवठा विभागाने बेकायदेशीररित्या घरगुती नळांना लावले जाणारे ‘टिल्लू पंप’ हटवण्यासाठी विशेष मोहीम सुरू केली आहे.
News reporter :- अतुल दिघाडे
या मोहिमेअंतर्गत झोन क्रमांक 1 मधील साईबाबा वॉर्डात आज (दि. 29 मे) महापालिकेच्या विशेष पथकाने अचानक धाड टाकत अनेक घरांमध्ये बेकायदेशीररित्या वापरले जाणारे टिल्लू पंप जप्त केले.
टिल्लू पंपामुळे परिसरात निर्माण होत होता असमतोल
घरगुती नळांना थेट टिल्लू पंप जोडून पाण्याचा अधिक दबावाने उपसा करणाऱ्यांमुळे अन्य सामान्य नागरिकांना पाण्याचा पुरवठा अपुरा होत आहे. अशा पंपांचा वापर हा केवळ बेकायदेशीरच नव्हे, तर सामाजिक दृष्टिकोनातूनही चुकीचा आहे. पंपाचा वापर करणाऱ्यांना अधिक पाणी मिळते, तर इतर अनेक कुटुंबांना काही वेळेस थेंबभर पाणी देखील मिळत नाही. त्यामुळे या प्रकारांवर आळा बसवण्याची गरज होती.
मोहिमेत अनेक टिल्लू पंप जप्त
साईबाबा वॉर्डात आज झालेल्या मोहिमेत मनपा पथकाने ठराविक घरांवर छापा टाकत टिल्लू पंप जप्त केले. या पंपांना सध्या महानगरपालिकेच्या ताब्यात घेऊन पुढील कारवाईसाठी राखून ठेवण्यात आले आहे. संबंधित नागरिकांवर जप्तीची कारवाई करण्यात येणार असून, त्यांच्यावर दंडात्मक शुल्कही आकारले जाण्याची शक्यता आहे.
नागरिकांचा प्रतिसाद उत्स्फूर्त
या मोहिमेला नागरिकांकडून सकारात्मक प्रतिसाद मिळत आहे. ज्यांनी कधीही टिल्लू पंप लावला नाही, त्या प्रामाणिक नागरिकांना आता पाणी मुबलक प्रमाणात मिळू लागल्याचे सांगण्यात येत आहे. काही नागरिकांनी तर मनपाच्या या धडक कारवाईचं जाहीर स्वागत करत, “दोषींवर कडक कारवाई झाली पाहिजे, तरच शहरात न्याय्य पाणीवाटप होऊ शकेल,” असे मत व्यक्त केले.
मोहीम अजूनही सुरूच — संपूर्ण शहर व्यापण्याचा निर्धार
महानगरपालिका पथकाची ही मोहीम केवळ साईबाबा वॉर्डापुरती मर्यादित नसून, संपूर्ण झोनमध्ये आणि इतर झोनमध्येही राबवली जाणार आहे. या अगोदर बालाजी वॉर्ड, भिवापूर वॉर्ड, महाकाली मंदिर परिसर याठिकाणीही अशाच प्रकारे धाड टाकून पंप जप्त करण्यात आले होते.
मनपा आयुक्तांनी स्पष्ट केले आहे की, “शहरातील पाण्याचा योग्य आणि समान पुरवठा व्हावा यासाठी कोणतीही कसूर केली जाणार नाही. नियमभंग करणाऱ्यांवर कठोर कारवाई केली जाईल.”
ही मोहीम येत्या काही दिवसांत आणखी तीव्र करण्यात येणार असल्याचे संकेत देण्यात आले आहेत. त्यामुळे पाणीपुरवठ्यात अडथळा निर्माण करणाऱ्या नागरिकांनी आता सावध राहणे गरजेचे आहे. पिण्याच्या पाण्याच्या समानतेसाठी महापालिकेचा हा प्रयत्न नक्कीच कौतुकास्पद असून, चंद्रपूरकरांनी यामध्ये सहकार्य करणे हीच काळाची गरज आहे.
